نصاءح طنط فتحية.......... اوعوا حد يعمل بيها

ازيكو ياجماعةعاملين ايه
دي نصايح طنط فتحية اللي
عاوز يعمل بيها هو حر انا مليش دعوة


فتحيّة: ألووووووووو
سَنيّة: أهلا يا توحة ازيك ؟

فتحية: مين سنسن ازيك انتي وعامله ايه ؟

سنية : الحمد لله ياختي بصي عندي ليكي خبر حلو

فتحية: خير ان شاء الله
سنية : فتكات بنتـي اتخطبت لمحسن ابن الأستاذ مسعود جارنا
فتحية: لولولولولي مبروك يا حبيبتي
سنية : الله يبارك فيكي عقبال بنتك رَوحيّة يا رب
فتحية : يا رب


لحد هنا تمام ومفيش اي حاجة

سنية : طبعا ح تشرفونا
فتحية : فين؟


سنية : هنا في بيت أبوها وكتب الكتاب في المسجد

فتحية: ايه ده ! الخطوبة في البيت ؟
...........هوّ بيتكم حايكفي أهل الشارع والجيران ؟ ده حتى عيلتكم كبيرة
سنية : ح يكفّي بس قولي ان شاء الله



الحمد لله فتحية بقى داخلة عالاسئلة المهمة امال ايه طبعا لازم تسال

فتحية : ان شاء الله ويا ترى جبتم الشبكة ؟

سنية : أمال ايه ...إسورة وخاتم زي العسل
فتحية : ايه إسورة وخاتم بس ! ده انتي بنتك تستاهل تُـقلها دهب
سنية : الله يخليكي المهم السعد



وبدا الشغل من هنا

فتحية : لا لا لا لا يا سنية انتو اتساهلتوا ..لازم العريس يدفع علشان يحس بقيمة

..........عروسته, كده رخّصتوها
سنية : تفتكري ياختي ؟
فتحية: طبعا ولازم يجيبلها أحسن فستان كمان
سنية : بس هي ح تلبس فستان أختها
فتحية : ايه....ده كلام ؟ ...دي ست العرايس
سنية : طب أعمل ايه ياختى ده خلاص الخطوبة بكره ؟
فتحية : كلّمي أبوه وأمه واتمسكي بموقفك .. لازم يجيب لها فستان ويزوّد الشبكة
..........وأعملوا الحفلة في نادي


بدات الوساوس تشتغتل تيرارارار



سنية : بس انتي عارفة جوزي ما بيحبش كده
فتحية : خلاص خليكي كده سلبيّـة وسيبي بنتك تتهان وتتباع رخيصة ,
..........فين الايجابية ؟ هو انتي ياختي ما سمعتيش عن صناع الحياة واللي بيعملوه
سنية : آه سمعت في التليفزيون
فتحية : خلاص أعملي حاجه بسرعة
سنية: أنا ح أقفل معاكي وأكلم أهل محسن



وفـعلاً..


فقد استجابت سنية لوسوسة فتحية....بعد ان كانت مرضية
وكلمت العريس وأهل العريس....ليبدأ مشوار الكفاح
وسكت الديك عن الكلام المباح



احم احم نعود لموضوعنا


المهم



اتفركشت الجوازة



وعيّطت فتكات ... اهئ اهئ ااااااااااه ياماما اهئ اهئ
ومرت الأيام وفي ليلة من الليالي سمعت سنية زغـروطة كبيرة



سنية : فتكات

فتكات : أيوه يا ماما

سنية : سامعة اللي أنا سامعاه ؟
فتكات : اهيء اهيء أيوه يا ماما
سنية : دي زغـاريـط ..يا ترى منين؟
فتكات : من عند طنط فتحية
سنية: الله...روْحيّـة اتخطبت ؟
فتكات : اهيء اهيء أيوة يا ماما


سنية : طب بتعيطي ليه..عقبالك يا نور عيني...ما تزعليش


فتكات : عارفة اتخطبت لمين يا ماما ؟

سنية : لأ...اوعي تقولي


فتكات : محسن يا ماما .. وقدّم لها نفس الإسوِرة والخطوبة ح تكون في بيتهم مش في
..........النادي.. وكمان لبست فستان بنت عمها


إهـيء إهـيء
إهـيء إهـيء (هي ومامتها)



وانتهت حكاية طنط فتحية


طبعا الحوار ده بيتكرر كتير واكتر منه

وفى مثل شعبى بيقول الكلام فى الودان امر من السحر

عايزين نقول كلام بجد :

اهم الشىء الرضا والقناعة بما قسمه الله عز وجل علشان الامور تمشى وتعدى

بس فى ناس حلوين اوى زى طنط فتحية كدة بيخلوا الامور تتشقلب

وأهم شىء السعادة وراحة البال

وعمر الفلوس ولا المظاهر هتسعد الناس لانها مرحلة وقتية وممكن تنتهى

الاخلاق والطبع هو ال بيستمر مع الانسان رحلة عمره