قيصدة ((العراق الحبيب)) للشاعر الشعبي عباس جاجان

ما انت بعيد انت العين واقرب من جفنها انت
وما انت غريب انت الوالد اللي يحظن بايديه وليده وبنته
وما انت وحيد انت الشعب كله بشيعته وسنته
منهو الكالك ناسيك هم ينسى الكمر وكته
لو نبض القلب يتنكر بدكته بس عشقك عشك مفضوح وعشك الناس كلها مساتر وسكته
صرت انت سبت وبركبة يهودي هم شايف يهودي يجوز من سبته
انت الفارس اليسبق هبوب الريح وما اظن خيل سابقته
وانت اليرهم ترابك كحل للعين ودوا للما شفت علته
ومن طينك نحني كفوف المعرسين وكل اصبع فرح من طينتك طقته
وانت الريحة ترابك ترد الروح هيل وزعفران وعنبر بشمته
ومثل تراب كاعك ما لكينا تراب يرهم للصلاة من طينته تربته
انت ينام بيك المرتضى الكرار التلوذ الناس كلها بشارته وبخته
وانت ينام بيك بكربلاء حسين الما بايع الطاغ وطنك ركبته
وانت الظلت بيك شارت العباس لمن طاح دنكله الفرات وباسه من شفته
من طلعت منك يوم طرني البين قلبي وياي ما جبته
اثاريني نسيته هناك عندك قلبي امنته
شتلته بجرف دجلة الخير ويه سباح الشواطي شربكت بته
وامتدن عروكه بوسط ذيج الكاع ومن ماي الفرات ودجلة عمدته
ولمن صار ينقل جدمه بين الناس اخذته وياي للكاظم على الشباك زورته
صح هسه اصبحت من وطن نيدرلان هولندي الهوية وشعري جللته
وصح اتأقلمت ويه الغرب فد نوب وصرت ماصخ مثلهم والملح عفته
العالم نسى يوم 11 من ايلول صارت بيك سالفته
ناس تكول لازم نحتويه ونشفط البترول ونعوض الراح ونسرق بركته
وناس تكول لازم هالحصار يدوم وناس تكول لازم ننزع اسلحته
وناس تكول خطيه اطفاله ماتوا من الجوع وناس تكول حيل وياه ماحمد ربه وشاكر نعمته
وانت بين هذا وذاك صارنب شبح لليرمون وياهو الكام ضدك سدد تفكته
كيف لانك حلوا والدول منه تغار ما عدهم العندك من مجد نلته
انت اول وطن آدم وضع جدمه عليه وكال يا الله ولانك وصلة من جلته
وانت اول وطن حبه النبي ابراهيم ودعا ربه يصونه برحمته وعزته
وانت اول وطن مرسى لسفينة نوح ونبي ايوب ناخت بيك راحلته
وانت اول وطن علم العالم ابجدية ويكتب التاريخ وانت اول وطن قانون سننته
وانت اول وطن كالتله الشمس يمه صباح الخير ولو رادت تمسي تمسي يم كبته
وانت اول وطن ما تشبه الاوطان مدري شلون ربك خالقك سبحان ربي شلون صورته
صورته العراق وبس علينا يلوك واحنا نلوكله لمن يحن وكته
عراق المال والابطال كل الناس واصفته هذولة اهل الغدر من عندك شيردون
كان جيبك مو الك لمن العرب ينخوك عزيز المال هيج وهيج طشرته
اشو لمن طحت محد اجاك وكال عد عيناك وانت جروحك ينزفن مثل دمع الشمع سكته
وبقيت وحيد مرمي بساحة الميدان واطفالك عليك بصفك ينوحون وانت تون ولا مثل مذبوح كبل ون ونته
كم غازي بغازي المر عليك وزال وتكنسه السنين متكبع بذلته
صفوا بالمزينلة ويلعنهم التاريخ وكل هذولة الغزاة اشخاص راحوا والبقيت انته
تراب بلادنا يرفض جدام الاجنبي والغازي والمحتل تراب بلادنا بس انبياء الله ساحقته