عن الغربة
الغربه وصــلة بور مابيــها ثمــره
تترجٌه غيم الصيف يمطرله كًًـطره
الغربــه زين وشين ذ ٌبت عليـٌـــــه
والعيـــشه وي بـــذاٌت أكبر بليـــٌـه
الغربه من الناس راوتني أشكـــال
والكذب لو بفلوس ما ظنـٌـه ينكًًـال
بالغربــه خاوه الروح تنـْوِخـذ كًًـوٌه
واليرِد حكًًٌــــه إبسيف مو بالمـروٌه
***********
عن عذاب الحبيب
لا بيَّ أروح أويــــاك لابيَّ أخَّــــليك
ساعه العذاب اوياك ساعه الأمل بيك
نتعذب آني وياك حُكـــم الليالي
ما بيهه لذه الآه للكَلبه خــــــالي
أسمع سمع بالعيد مادامــك بعيد
ما باوست خـَّدين ما صافحت إيد
لامعتبرني إهواك لا إنتـــــه ناســي
مثل الشمع ظليت ناري أعله راسي
***********
عن التضحية
رش الدرب تيــزاب حافي أعتـني لـك
جا شـلي بالرجليـن الما تجي لــــك
لو ترش مو تيــزاب لو تزرع ألغــام
اللحم خلـه إيروح أوصلـــك إعظـام
***********
عن الفراق
أرد انشدك وارجوك صارحني ياهواي
تذكرني لوغصيت من تشرب المــاي
كل ما يجي الليل أذكر وفــــاكم
واذكر محاشي الطيب وابجي أبرهاكم
ويا النجم سهران وايدي أعلى خــدي
الليل أوظلام الليل شو كلها ضـــدي
نارك يخايب ماي مومثل نـــاري
اومن يطري بيا الشوق يحترق جاري
وحدي ابنص الليل بس حيرتي أوياي
أبجي أعلى وقت الراح واتنطر الجاي
شحجي وتريد الناس من عندي أحجـي
دمعتي إبطرف العين بس أحجي أبجـي
***********
عن الاخوة
للخوه ماقضيت شي ماقضيته
حتى الصخر ياناس وتوسديته
بالك تقول الاه ياخويا بـــالك
كل التقوله ايصير روحي ابدالك
مبخوت أضل للشيب يافلان أذكـرك
أوينكرني نور العين من كون أنكرك
انت العطش والماي وانت المشوفـه
ورسمك وحق عيناك بالكاس اشوفه
***********
عن الخيانة
بيدي أوقرضها الفار فجت عباتي
كل هذا ماطخيت وامشي ابرهاتي
لاتهتم على الراح وي همك الراح
والعالي مو بالطول بالصبر ينلاح
يسألني البطران حالك إشلونــه
الغاضب الله إعليه هم ينشدوونـه
عبالي طيب زاد واعطيتك اعيون
تالي توج النار ويا اليكرهـــون
علمني عالنسيان ارد انسى ضيمـك
وي غيري قمره اتصير بس حصتي ضيمك
***********
عن الدنيا
الدنيا بس وياي شـدت عـــداوه
ولا واحد إمن الناس لجروحي داوه
ارد انشد الصباغ هم يصبغ اقــلوب
اصبغ دليلي اعليك واحزن فرد نوب
الدنيا ماتسوة لاتصفن إلهـا
عالطيب والمزيون يكثر حملها
الدنيا بس أوياي صارت حريصـه
أو من سلة المكتوم تطلع لي شيصه
***********
عن الشماتة
شمـاتي مو شـمات شمـاتي شمات
بالكًًبر ويسألـون حي بعده لو مـات
شماتي موشمات شماتي خوتـي
حته امي ياهل ناس تتمنه موتي
شماتي موشمات شماتي اشرار
بالكبر ويقولون ياربي بالنـار
شماتي موشمات شماتي ورطــه
نصهم امن واجرام والباقي شرطه
شمـاتي مو شمـات شماتي تسعه
والعاشر إزغيرون يأشر باصبعـه