قصة الحب الغريبه

أبتدت من واحد وعشرين عام
وأستحق الوقت لجهوده وسام
وأنتهت في يوم أضّنــاه الظلام
ياحرام .. ياحرام .. يا حرام

كان وحده
طفل يسعده المزاح
البراءه كانت لقلبه وشاح
لاهموم ولاطعون ولاجراح

مايسولف غير لأمه
وأن لقى ورد ٍ يشمّه
هادي وهيمان طيبه
وكان صمته له ضريبه
آآآآه ياكبر المصيبه
قصة الحب الغريبه

**


مرعام وبعد عام وبعد عام
أبتدا يكتب ويقرا
عد من واحد لعشرا

ولاسمع جده يسولف
جاك يسمعه بفضول
هرج بنـّاي العقول
قول ياجدي وقول
هات هات من الكلام
بأقعد اسمعك بؤئام
الين نام
الين نام

وأستمر يشيل في فكره ونفسه
حكمة ٍ منّا وعلم ٍ من هناك
وأبتدا يزداد ترنيمه وهمسه
ويتفكك من قيود الارتباك

بالفعل مسكين طيب
مادرى وشهو نصيبه
قصة الحب الغريبه

**

ركض فيه الزمن حتى
وصل عمره ثمان سنين
حدود أحلامه البسمه
وشوفة علبة التلوين

وفي ليلة فرح كانت تجمّع كل اصحابه
زواج وحفل وطبول وسعاده

وهو بحكم سنه مايعاقب
مع أمه جالس وقاعد يراقب
بنات الحفل يلعبن بلطافه
وأمه تصفق وتغري هتافه

وفي لحظه
قسم بالله يمكن دون من لحظه
لمحها
بنيه أم ستة سنين
تلم الزهر تنثر ياسمين
تمايل من يسار ومن يمين
وهو ضاق وتزايد به حنين
ويسأل (يومه هذي بنت مين)

تجاوب أمّه وتتركه حارنب
وقلبه فيه شي ٍ مايعرفه
يثور ومادرى هو له ثارنب
يرد البيت ويحضن صمت غرفه

وتبدا قصة الحب الغريبه
بعد دنيا ظواهرها رتيبه

**

ملل
كان بخفوقه محتويه
وبعد العرس
اقفا مايبيه

وتبدأ فلسفه من نوع آخر
صغير الحب مايعرف دروبه
يحس انّه بحر وسطه بواخر
ودمه فارنب بطبع العروبه

والوكاد انّه وقع
ونجمه الخافي سطع
وأبتهل درب الغرام
وما أظن انّه رجع

أغتصبه العشق في صغره غصيبه
وبين شك وبين ريبه
أستمرت قصة الحب الغريبه

**


والزمن دوّار والدنيا تدور
ناس تنشا وناس تحضنها قبور

والفتى صار محسوب
وأن خطا يجني ذنوب

كلمته سيف ومداهيله قصور
راسي وراكد .. كسب وصف الوقور
مارمى خيط الأمل في بحر واهم
ولا يثير شجونه اسفاف الزهور

والعيون اكثار كل ٍ وده بقربه لهم
بصراحه الولد طيّب ومحبوب وشهم
مادرو عن حال قلبه
عاشق النظره الوحيده
عاشق الزهره الفريده
مانساها والله أنّه مانساها
يهتني الذكرى ويتنفس هواها

بس هي داخل عيونه
تملك حدوده ودونه
وتملك أحساس الشعور
وتغرقه بأعتى البحور

من كثر حبه وشوقه صار شاعر
له قصيده أسمها (صمت المشاعر )
وله قصيده أسمها ( لا لا تسافر )
وله قصايد وله خواطر
وله روايات ومنابر
كل هذا وبسبب بدر البدور

ليتها تدري عن الشاعر وعن حالة خفوقه
وعن عروقه
وعن أحاسيسه وشوقه

سالفتهم بالفعل صارت عجيبه
يا عسى ماهي تعيبه
قصة الحب الغريبه

**

جلس مره مع نفسه ويسأل
كيف صارت
رد طيف ٍ مادرى من وين ساري
صارت أحلى
صارت أكمْل
دامها طفله خذت عقلك يا أهبْل
لأكبرت بتصير أجمْل

غفار روميو زمانه ويتأمْل
خياله فك أسره جاك وأقبْل
رسم لوحه بألوان الغرابه
وكثر الاسئله زادت كأبه

رسمها مثل ماوده تصير
حرير
يلبسه حضرة أمير

صحا من غفوته من غير لوحه
بس بوحه
والقهر يبكي جروحه

لمح مراءة حزنه شاف شيبه
يردد كلمه بحاله كئيبه
يردد ( قصة الحب الغريبه )
نهايتها ملامحها قريبه

**

وأشغلته الدنيا من صوب ٍ وصوب
من شروق الشمس ليا حد الغروب
من هناك ليا هناك ليا هناك
لين عقله جاه داء الانفكاك

السنين تمر
وتسرقه السنين
شي غث
وشي مقداره ثمين
وكل مايسأله واحد ( أيش حالك)
قال أنا والحمد لله زين زين

والحقيقه أن حلمه في هلاك
وكل يوم يمر يكتب للزمن
يا زمن ليا متى ولا متاك
فاض صبري أنتظر رشفات ماك
وبين واقع وبين حلم
الله يا كثر العراك

صار جندي والبخت في قسوته صارنب كتيبه
يجرحه مليون مره ويعدي به
قصة الحب الغريبه

**

عصر يوم الخميس
الجو كان بقدرة الواحد
نسيم هدوء
كان الجو فعلا رايق وراكد
وهو جالس مع الوالد

وفجاءه دون أي مقدمات ودون اي طاري
نظر له شايبه ثم قال.. يامكبر فرح جاري

ولده اليوم عرسه .. ماخذين بنية أبو فلان
قسم بالله لو شفته تحس شلون هو فرحان

في وسط زحمة حديثه أنذكر له اسمها
أسمها جوليت والله بنت ابوها وأمها
أسمها
وعرسها
آه ما أقصى درسها
العلم سبب صواعق وقعها قاسي
صاح الولد آه تكفي يايوبه راسي

البنت والله عادها صغيره
يعني أنقضو نسوان هالديره
وشفي مها وأحلام ومنيره

بضعة ملاين بنت مالقى الا هي
والمشكله يايوبه أنّي خابره فاهي
وش فايدة هرجي ..
من اللي يسمع أعذاري
مدام اصرار وقتي حطمي أصراري

قام والبسمه خلطها شي أشبه بالغموض
آه يا قل الحظوظ

ضاق ثوبه وشق جيبه
وسال همه في شعيبه
البدايه ماتشابهها نهاية
قصة الحب الغريبه

**

خيّم الليل وكان اقسى مسا
هم مع حزن مع نغمة آسى

عرفها وسط عرس وفرح
وبكاها وسط عرس وفرح
وتبدد كل حلم ومابقى له غير جرح

ضاقت عليه هموم اشعاره
والصمت في داره

ودقت ساعة الاثنا عشر
وكن الليل نادى يابشر
لا والف لا لا للضجر
دام يطعني قمر
أنت يا هايم بتسكني قصر

جاوب خطاب الليل وأرضى مساريه
راح يتخبط في السكون ويجاريه

جلس
يفرش همومه ويتقهوا دموعه
بين ضيقة بال واذلال لوعه

رفع عينه الى الاعلى
ويدعي يا عسى أسلى

وأخيرا شافها بين النجوم
صورتين
صوره وهي ترقص وطفله
وصوره وهي تضحك بـ حفله

صاح بأعلى صوت
هيه هيه انتي ياحبيبه
انتهت بك
قصة الحب الغريبه
ياحبيبه ياحبيبه
لك تحياتي وسلامي
وفي ذرا خافقه نامي
ومن على صدره ترامي
مابقى عندي سوى فكرة قصيده
هي جديده
شوفي مطلعها أمامي

كنها صاحت أمانه خلها بيني وبينك
خايفه لامن قرتها الناس تقراني بعينك

لاتخافي لا تخافي

يا كثر عشّاق هالديره
وياكثر من حب له صغيره

بس قبل أختم كلامي
وقبل أنتي لا تنامي
ودام مطلعها أمامي

اسمعيها

قصة الحب الغريبه
أبتدت من واحد وعشرين عام
وأستحق الوقت لجهوده وسام
وأنتهت في يوم أضّنــاه الظلام
ياحرام ..
ياحرام ..
يا حرام ..